Te tangata nānā i noho whakarua.
Ka rangaranga te muri.
Ka tūtū ngā tuatara o te tāmure.
Ko au, ko au tēnei.
Ko Tutāmure.

Ko Hoani Temepara me Te Iwi Ware Kurei ōku koroua.
Ko Harete Temepara me Rata Hira Kurei ōku kuia.
Ko Hoani rāua ko Tarere ōku Mātua.
Ko Jonnina Temepara toku ingoa.
Ko Tahliah Temepara toku tamahine.

He uri ahau nō ngā iwi a Te Whakatōhea, Ngai Tai, Ngai Tuhoe me Te Aitanga ā Hauiti.
Ko Ngāti Rua, Ngāti Ira, Ngāti Ngahere, Ngai Tamahaua me Torere ōku Hapu.
Ko Omarumutu, Opeke, Terere, Opape me Torere ōku Marae.

I tipu ake au i Ōpōtiki, kuraina ahau ki te kura tuatahi o Ōpōtiki, whai muri ko aku matauranga kura tuarua ki te Kareti o Ōpōtiki. I taku tau whakamutunga i te kāreti ko ahau tētahi o nga Kaitiriwā Kotiro. He tūnga whakahirahira tēnei mō toku whānau, mō oku marae/hapu hoki.

Ko Tawhiro Maxwell tētahi ō oku tino Kaiako i tera wā. Ko āna tino hiahia mō ōna ākonga e wehe ai ki te ao, kia kore e wareware he uri koe nō Te Whakatōhea me tū pakari Māori ai ahakoa kei hea koe, ahakoa te aha.

Whakamutu ake aku matauranga ki te kāreti i wehe au mo Rotorua ki te whai atu i te tohu Kaiako. I reira ahau e noho ana mo ngā tau 18. E rua tau ki muri (2015) i hoki mai ahau ki taku ūkaipo ā Ōpōtiki.

Kei te kura tuatahi au i Omarumutu e whakaako ana. Nā ōku tipuna e karanga mai ki au, ki te hoki mai. Hei akiaki i ngā tikanga, te reo me te haahi ki ngā tamariki.

Ko aku herenga whakapapa ki te whenua nā tōku tipuna koroua a Waiapu Te Tawhiro. Ko taku maunga a Makeo e whakaruruhau ia matou ngā uri o Tutāmure.

I aku tamaititanga ko te nuinga o te wā i ngā marae au i te taha o taku kuia a Harete Temepara. I tipu ake ahau i raro i ngā rekereke o aku kuia me aku koroua ki Ngāti Rua me Ngāti Ira. I reira ahau e kite ana i ngā painga o ēra rā. Ko te Tikanga o te marae, te Haahi Ringatū ngā Hītori, mahi Māara rānei, ēra mōmō kaupapa o te aō Māori.

He kaihaka hoki au mo te kapa haka o Ōpōtiki mai i tawhiti. I timata ahau i te tau 1999. Ko te ao kapa haka tētahi o aku tino runaruna. Ehara a Ōpōtiki mai i tawhiti te kapa haka noaiho, he kura hoki. Kua tipu au i raro i ngā whakaakoranga ā Te Kahautu Maxwell, Te Okeroa Huriwaka, Jane Green, Eric Kurei rātou ko Blythe Rogers Me Piko Rogers. Ehara te whakataetae noaiho te kaupapa. Ko te nuinga o te wa kei te ako matou i ngā hītori, pūrakau a ō matou tipuna, ngā whakapapa, ngā tikanga, te Haahi Ringatū he nui ngā akoako. Waimarie tātou ngā kaihaka ia Uncle Dudu.

I whānau mai taku tamahine i te tau 2002. I tipu ake ia ki Te Arawa. E whakaaro nui ana ia nō Te Arawa kē aia. Kuraina aia ki te kura tuatahi o Kawaha me Te Kura Takawaenga o Rotorua. I te tau 2015 ko ia tētahi o ngā tauira o tana kura i rere atu kia Italy. Ko te kaupapa i muri i tēnei haerengā ko te whai i ngā tapuwae o ngā Hoia Maori o te Pātariana 28. I reira ia i kite i ōna tipuna a Pte P.Tai, Pte J.Tai me LCpl H.Mitai. He honore nui tēnei mōna. I kite aia i ngā wāhi whawhai, i whea hoki rātou e moe ana, me te kite hoki i ngā wāhi i pupuru.

Ko aku tino hiahia mo taku iwi, kia tautokohia ki ō tātou marae.

Kei te itiiti haere nei ō mātou kaumatua. Ko wai ka tū ake ki te karanga, whai korero rānei.

Koutou ngā whānau e noho ki ngā taone nui, ki motu kē hoki mai ki te whakaako kia mohio ai ō tamariki, mokopuna. Kia kore e rite ki te moa, tō tātou Reo, Tikanga me tō tātou Haahi Ringatū.

Kia aro, kia whakapono ki ngā kaupapa hei oranga pai, mō ngā uri katoa. Mō ō tātou mokopuna, ngā rangatahi, ngā pakeke me te hunga kaumatua.

Kia kitea i te huarahi tika hei oranga mo ngā whānau e kimi mahi.

Mai ngā Kuri ā Whārei ki Tihirau. E i, te tapu ō Muriwai e.